தமிழ் எங்கள் உயிருக்கு நேர்.......(1)=> (20.04.2017 )

தமிழுக்கு அமுதென்று பேரென்பார் - நானோ            

         தன்சுவையில் செங்கரும்புச் சாரென்பேன்            

தமிழெங்கள் உயிருக்கு நேரென்பார் - நானோ              

         தனிமைக்கு துணையாகும் தாயென்பேன்      

அமிழ்தத்தை மிஞ்சுகிற மொழியென்பார் - நானோ    

         அறியாமை அகற்றுமொரு ஒளியென்பேன்     

குமிழுக்குள் ஒளிர்கின்ற ஒளியென்பார் - நானோ             

         குறுநகையில் புன்முறுவல் சிலையென்பேன்             

முத்தினை வெல்லும் மொழியென்பார் - நானோ

          முத்துக்குள் ஒளிரும் மணியென்பேன்

தித்திக்கும் தேன்சுவை மொழியென்பார் - நானோ

          திகட்டாத தெள்ளமுது சுவையென்பேன்

பத்தரை மாற்று பொன்னென்பார் - நானோ

         பகுத்தறிவு மானிடர்க்குப் புகழென்பேன்

சித்திரைத் திங்களுடன் பிறப்பென்பார் - நானோ

         சீராக ஆண்டெல்லாம் சிறப்பென்பேன்

இத்தனை புகழுக்கும் தகுமென்பார் - நானோ

          அத்துனை மொழிகட்கும் மிகுமென்பேன்

தத்துவம் நிறைந்ததொரு மொழியென்பார் - நானோ

          சத்தியம் காக்கும் விழியென்பேன்

பத்தினி குணம்கொண்ட மொழியென்பார் - நானோ

          பக்தர்கள் வியக்கும் மொழியென்பேன்

வித்தகர் போற்றும் மொழியென்பார் - நானோ

          வித்துக்குள் வித்தான மொழியென்பேன்         

போற்றிப் புகழ்ந்தது போதுமென்பார் - நானோ

         போற்றி மகிழ்ந்தது போதாதென்பேன்

ஏற்றம் இனிமேல் இல்லையென்பார் - நானோ        

         ஈனர்கள் வாய்மொழி தோற்குமென்பேன்

ஆற்றுப் படுகை மணலென்பார் - நானோ

         அருஞ்சுனை ஊற்றெடுக்கும் வயலென்பேன்

ஊற்றும் ஒருநாள் ஓயுமென்பார் - நானோ

         ஊரும் சேற்றிலும் மலருமென்பேன்

எண்ணிய சிறப்புகள் இவைதானா? - இல்லை

        இன்னும் எத்தனையோ உண்டென்போம்

பின்னிய இலக்கிய மொழியென்பார் - நாமோ

        பிழைநீக்கும் இலக்கண மொழியென்போம்

அன்னிய மொழிகளை வெல்லுமென்பார் – நாமோ

        அத்தனை மொழிகளையும் ஆளுமென்போம்

நுண்ணிய உயிருக்கு நேரென்பார் - நாமோ  

        நிலையற்ற உயிருக்கும் மேலென்போம்.

                        &&&

குறிப்பு: 20.04.2017 அன்று மதுரை உலகத் தமிழ்ச் சங்கம் தமிழ் நிலா கவியரங்கம் -3 ல் படைக்கப்பட்டது